بافڵ تاڵەبانی: دەمانەوێت هەڵبژاردنێكی بێگەرد و راستەقینە لە وادەی خۆیدا بەڕێوەبچێت
پەرەگراف
بافڵ تاڵەبانی جارێکی دیکە جەخت لە ھەڵوێستی حیزبەکەی دەکاتەوە بۆ ئەنجامدانی ھەڵبژاردنی پەرلەمانی کوردستان لە وادەی دیاریکراو کە ٢٥ی شوباتی داھاتووە.
"دەمانەوێت هەڵبژاردنێكی بێگەرد و راستەقینە لە وادەی خۆیدا بەڕێوەبچێت و وەڵامدەرەوەی خواستی هەموولایەك بێت، بۆ ئەمەش یەكێتی ئامادەیە و ئامانجمان بەهێزكردنی پایەكانی دیموكراسییە لە هەرێمەكەمان" سەرۆکی یەکێتی وا دەڵێت.
ئەو وتانەی تاڵەبانی، لە کۆبوونەوەیدا بووە لەگەڵ ستیڤن چارڵس هیچن، باڵیۆزی بەریتانیا لە عێراق کە ئەمڕۆ لە دەباشان پێشوازیی لێکردووە.
سەرۆکی یەکێتی لەبارەی پەیوەندییەکان لەگەڵ بەغداد دەڵێت "فراوانكردنی هەماهەنگییەكان لەگەڵ بەغدا و چارەسەركردنی كێشەكان لەسەربنەمای دەستوور، فاكتەری چارەسەركردنی كێشەكانە و دەبێت هەموومان بە رۆحێكی نیشتمانی و بەرپرسیارانە مامەڵە بكەین وهەرێمەكەمان بەرەو ئاوەدانی و سەقامگیریی زیاتر ئاڕاستە بكەین".
هەڵبژاردنی پەرلەمانی كوردستان دەبوو لە مانگی ١٠ی ٢٠٢٢ بەڕێوە بچێت، سەرەڕای دوو جار دیاریكردنی وادەی هەڵبژاردنەكە لەلایەن سەرۆكی هەرێمەوەو فشاری ناوخۆیی و دەرەکیی بۆ ئەنجامدانی هەڵبژاردنەکە، بەڵام بەهۆی ناكۆكیی لایەنەكان لەسەر یاسای هەڵبژاردن، پڕۆسەکە ئەنجام نەدرا.
لە ماوەی سێ دەیە حوكمڕانیی هەرێمی كوردستان و لە دوای یەكەم هەڵبژاردنەوە لە ١٩-٥-١٩٩٢، هیچ پڕۆسەیەكی هەڵبژاردن بۆ پەرلەمانی كوردستان لە وادەی یاسایی و دیاریكراوی خۆیدا بەڕێوە نەچووە.