پەرەگراف
هەردوو وەزیری نەوتی عێراق و وزەی توركیا لە ئەنقەرە كۆبوونەوە. بەپێی ڕاگەیەندراوی هاوبەشی كۆبوونەوەكە، هەردوو لا جەختیان لە گرنگیی دەستپێكردنەوەی هەناردەكردنی نەوتی هەرێمی كوردستان و كەركووك لە ڕێی بەندەری جەیهانی توركی كردووەتەوە.
پاش ئەوەی دوێنێ گەیشتە توركیا، ئەمڕۆ حەیان عەبدولغەنی، وەزیری نەوت و جێگری سەرۆكوەزیرانی عێراق بۆ كاروباری وزە، لە ئەنقەرە لەگەڵ ئەلەب ئەرسەلان بەیرەقدار، وەزیری وزە و سامانە سروشتییەكانی توركیا كۆبوونەوە.
بە پێی ڕاگەیەندراوێكی هاوبەش كە وەزارەتی نەوتی عێراق بڵاوی كردووەتەوە، لە كۆبوونەوەكەدا هەردوو وەزیر "گفتوگۆیان دەربارەی كۆمەڵێك بابەتی دووقۆڵی و ناوچەیی گرنگ بۆ هەردوولا"یان كردووە.
هەروەها هەردوو وەزیر "جەختیان لە گرنگیی هێڵی بۆریی نەوتی خاو لە نێوان عێراق و توركیا و پێویستیی دەستپێكردنەوەی هەناردەی نەوتی خاو" كردووەتەوە.
ڕاگەیەندراوەكە ئاماژەی بەوە كردووە كە دەستپێكردنەوەی هەناردەی نەوت دەكەوێتە دوای دوای "تەواوبوونی پرۆسەی نۆژەنكردنەوە و پشكنینی پێویست" بۆ بۆریی نەوتی نێوان هەردوو وڵات كە بەهۆی بوومەلەرزەكەی مانگی شوباتی ساڵی ڕابردووی توركیا زیانی بەركەوتووە.
هاوكات هەردوو وەزیر باسیان لە هەوڵەكان بۆ بەرزكردنەوەی ئاستی هاوكاریی هاوبەش لە بوارەكانی وزە، نەوت و گاز و بەستنەوەی كارەبا و وزەی نوێ كردووەتەوە.
بڕیارە لیژنەی ئابووریی هاوبەشی عێراق - توركیا كە هەردوو وەزیرەكە سەرپەرشتی دەكەن، نۆزدەیەمین كۆبوونەوەی لە بەغداد ئەنجام دەدات.
هەر لە چوارچێوەی هەوڵەكان بۆ دەستپێكردنەوەی هەناردەی نەوتی هەرێم و كەركووك كە پێنج مانگە ڕاگیراوە، بڕیارە ئەمڕۆ یان سبەی هاكان فیدان، وەزیری دەرەوەی توركیا، بە سەردانێكی دوو ڕۆژی بگاتە بەغداد و دواتر سەردانی هەولێرش دەكات.
كۆبوونەوەكان لە كاتێكدان كە پێشتر باس لە سەردانی ڕەجەب تەیب ئەردۆغان، سەرۆككۆماری توركیا بۆ عێراق دەكرا، هەروەها وەزیری سامانە سروشتییەكانی هەرێم پێشتر ڕایگەیاند، ئەردۆغان بۆ گفتوگۆ لەسەر كێشەی نەوت، دێتە عێراق.
پێدەچێت سەردانی ئەردۆغان بكەوێتە دوای كۆبوونەوەی بەرپرسانی باڵای توركیا لەسەر ئاستی وەزارەتە پەیوەندیدارەكان و سەرۆككۆماری توركیا بۆ واژووكردنی ڕێككەوتنی كۆتایی لەبارەی هەناردەی نەوتەوە سەردانی بەغداد بكات.
هەناردەی نەوتی هەرێمی كوردستان لە 25-3-2023 لەلایەن توركیاوە ڕاگیرا، پاش ئەوەی كە ئەنقەرە سكاڵایەكی لەوبارەیەوە لە دادگای نێودەوڵەتیی ناوبژیوانیی پاریس بە بەغداد دۆڕاند.
بڕیارەكەی دادگای پاریس، حكومەتی هەرێمی ناچار كرد بە ڕادەستكردنی نەوت بە بەغداد و هەناردەكردنی لە ڕێگەی كۆمپانیای بەبازاڕكردنی نەوتی عێراق (سۆمۆ) ڕازی ببێت. لە ماوەی نزیكەی پێنج مانگی ڕابردوویشدا، بەهۆی ڕاگرتنی هەناردەی نەوتەوە، ملیاران دۆلار زیان بە هەرێمی كوردستان گەیشتووە.