پەرەگراف
بۆ گفتوگۆكردن لەسەر دەستپێكردنەوەی هەناردەكردنی نەوتی هەرێمی كوردستان و كەركووك، وەزیری نەوتی عێراق بە سەردانێك گەیشتە ئەنقەرەی پایتەختی توركیا.
وەزارەتی نەوتی عێراق ئێوارەی ئەمڕۆ ڕایگەیاند "وەزیری نەوت گەیشتووەتە توركیا بۆ گفتوگۆ سەبارەت بە ژمارەیەك دۆسیە، لە سەروو هەموویانەوە دەسپێكردنەوەی هەناردەی نەوت لە ڕێگەی بەندەی جەیهانی توركییەوە".
بەپێی ڕاگەیەندراوی باڵیۆزخانەی عێراق لە ئەنقەرە، سەردانەكەی حەییان عەبدولغەنی، وەزیری نەوتی عێراق، دوو ڕۆژ دەخایەنێت و لەگەڵ وەزیری وزە و سامانە سرووشتییەكانی توركیا و ژمارەیەك بەرپرسی دیكەی توركیا كۆدەبێتەوە.
ڕاستەوخۆ دوای سەردانەكەی حەییان عەبدولغەنی، وەزیری دەرەوەی توركیا بۆ هەمان مەبەست سەردانی عێراق دەكاتەوە. بڕیارە ڕۆژی چوارشەممە 23-8-2023، هاكان فیدان، وەزیری دەرەوەی توركیا، بە سەردانێكی دوو ڕۆژە بگاتە بەغداد و سەردانی هەولێریش بكات.
ئەوەی كە ئاشكرایە، دەستپێكردنەوەی هەناردەی نەوت، تەوەرێكی سەرەكیی گفتوگۆكانی سەردانەكەی وەزیری دەرەوەی توركیا دەبێت، بەڵام چاوەڕوان دەكرێت پەیوەندییە دووقۆڵییەكان و ژمارەیەك پرسی دیكەش لەگەڵ بەرپرسانی باڵای عێراق تاوتوێ بكات.
هەر بەپێی ڕاگەیەندراوی باڵیۆزخانەی عێراق لە ئەنقەرە، وەزیری نەوتی عێراق "ژمارەیەك پرسی گرنگ تایبەت بە پەرەپێدان بە پەیوەندییە دووقۆڵییەكان و فراوانكردنی ئاسۆی هاریكارییەكان لە بواری نەوت و غاز و وزە، دەستپێكردنەوەی هەناردەكردنی نەوت لە بەندەری جەیهانی توركیا لەگەڵ بەرپرسانی توركیا تاوتوێ دەكات".
كۆبوونەوەكان لە كاتێكدان كە پێشتر باس لە سەردانی ڕەجەب تەیب ئەردۆغان، سەرۆككۆماری توركیا بۆ عێراق دەكرا، هەروەها وەزیری سامانە سروشتییەكانی هەرێم پێشتر ڕایگەیاند، ئەردۆغان بۆ گفتوگۆ لەسەر كێشەی نەوت، دێتە عێراق.
پێدەچێت سەردانی ئەردۆغان بكەوێتە دوای كۆبوونەوەی بەرپرسانی باڵای توركیا لەسەر ئاستی وەزارەتە پەیوەندیدارەكان و سەرۆككۆماری توركیا بۆ واژووكردنی ڕێككەوتنی كۆتایی لەبارەی هەناردەی نەوتەوە سەردانی بەغداد بكات.
هەناردەی نەوتی هەرێمی كوردستان لە 25-3-2023 لەلایەن توركیاوە ڕاگیرا، پاش ئەوەی كە ئەنقەرە سكاڵایەكی لەوبارەیەوە لە دادگای نێودەوڵەتیی ناوبژیوانیی پاریس بە بەغداد دۆڕاند.
بڕیارەكەی دادگای پاریس، حكومەتی هەرێمی ناچار كرد بە ڕادەستكردنی نەوت بە بەغداد و هەناردەكردنی لە ڕێگەی كۆمپانیای بەبازاڕكردنی نەوتی عێراق (سۆمۆ) ڕازی ببێت. لە ماوەی نزیكەی پێنج مانگی ڕابردوویشدا، بەهۆی ڕاگرتنی هەناردەی نەوتەوە، ملیاران دۆلار زیان بە هەرێمی كوردستان گەیشتووە.