پەرەگراف
ڕۆژنامەنووسان و چالاكانی مەدەنی دەڵێن "هەرێمی كوردستان پێی ناوەتە قۆناغێكی مەترسدار لە زەوتكردنی ئازادییەكان و دۆخەكە بەرەو سیستەمێكی ئەمنیی تەواو هەنگاو دەنێت. ئەمەش وای كردووە كوردستان وەكوو ناوچەیەكی مەترسدار بۆ كاری ڕۆژنامەنووسی سەیر بكرێت".
ئەمڕۆ لە هەولێر، سلێمانی، دهۆك و هەڵەبجە گردبوونەوەی هاوكات بۆ ئازادكردنی چالاكان و ڕۆژنامەنووسانی بادینان بەڕێوە چوو، بەڵام لە دهۆك هێزە ئەمنییەكان ڕێگرییان كرد.
بەیاننامەیەكی هاوبەش لەلایەن چالاكان و ڕۆژنامەنووسانەوە خوێندرایەوە كە تێیدا هاتووە "كابینەی نۆیەم لە سەرەتای دەستبەكاربوونی، بەڵێنی چاكسازی و فراوانكردنی پانتاییەكانی ئازادیی ڕادەربڕینی دا، بەڵام بە پێچەوانەوە دۆخی مافی مرۆڤ و ئازادیی بیروڕا و ڕۆژنامەوانی و كاری ڕێكخراوەیی لە هەرێمی كوردستان، بە شێوەیەكی بەرچاو ڕووی لە پاشەكشە كردووە و چیتر قبووڵ ناكرێت".
ئەوان دەڵێن "سزادانەوەی شێروان شێروانی و ئازادنەكردنی گوهدار زێباری، نوێترین زنجیرەی خراپ بەكارهێنانی یاسایە دژی ڕۆژنامەنووس و چالاكاوانان".
هەروەها پەیام ئاراستەی دادگای پێداچوونەوە و دادگای هەولێر دەكەن كە "ئەم پێشێلكارییە ڕاست بكەنەوە، بۆ ئەوەی بێمتمانەیی خەڵك بە دادگاكان قووڵتر نەبێتەوە ".
ڕۆژنامەنووس ئومێد بەرۆشكی لە دهۆك دەڵێت "هێزە ئەمنییەكانی دهۆك بەبێ ئەوەی گردبوونەوە و خۆپیشاندان ئەنجام بدەین، ڕێگەیان بە من و هاوڕێكانم نەدا تەنیا بەیاننامەیەك بۆ ئازادكردنی شێروان شێروانی و گۆهدار زێباری بخوێنینەوە، لە كاتێكدا لە هەولێر، سلێمانی و هەڵەبجە بەیاننامەكە خوێندرایەوە".
ئەو ڕۆژنامەنووسە دەشڵێت "ئەم ڕێگرییانە وای كردووە دهۆك وەكوو مەترسیدارترین ناوچە بۆ ئازادیی ڕادەربڕین لە هەموو عێراقدا، بناسرێت".