عێراق و توركیا گفتوگۆكانی هەناردەكردنەوەی نەوت دەبەنە قۆناغێكی باڵا؛ هاكان فیدان دێتە بەغداد و هەولێر
پەرەگراف
پاش نزیكەی پێنج مانگ لە ڕاگرتنی هەناردەی نەوتی هەرێمی كوردستان، هەفتەی داهاتوو عێراق و توركیا لەسەر ئاستی باڵا گفتوگۆكانیان لەوبارەیەوە دەست پێ دەكەنەوە. وەزیری دەرەوەی توركیا دێتە بەغداد و سەردانی هەولێریش دەكات.
ماڵپەڕی عێراق ئۆیل ڕیپۆرت ئاشكرای كرد، عێراق و توركیا هەفتەی داهاتوو لەسەر ئاستی وەزارەتەكان سەردانی یەكتر دەكەن، ئەمەش لە كاتێكدایە دانوستانەكان بۆ كردنەوەی بۆریی نەوتی عێراق - توركیا بەردەوامە.
بەپێی لێدوانی چوار بەرپرسی عێراقی بۆ ماڵپەرەكە، هاكان فیدان، وەزیری دەرەوەی توركیا، لە ڕۆژانی 23 و 24ی ئاب سەردانی بەغداد و هەولێر دەكات.
هاوكات بەرپرسێكی وەزارەتی نەوتی عێراق ڕایگەیاندووە، وا بڕیارە حەیان عەبدولغەنی، وەزیری نەوتی عێراق، سەرەتای هەفتەی داهاتوو سەردانی ئەنقەرە بكات.
كۆبوونەوەكان لە كاتێكدان كە پێشتر باس لە سەردانی ڕەجەب تەیب ئەردۆغان، سەرۆككۆماری توركیا بۆ عێراق دەكرا، هەروەها وەزیری سامانە سروشتییەكانی هەرێم پێشتر ڕایگەیاند، ئەردۆغان بۆ گفتوگۆ لەسەر كێشەی نەوت، دێتە عێراق.
پێدەچێت سەردانی ئەردۆغان بكەوێتە دوای كۆبوونەوەی بەرپرسانی باڵای توركیا لەسەر ئاستی وەزارەتە پەیوەندیدارەكان و سەرۆككۆماری توركیا بۆ واژووكردنی ڕێككەوتنی كۆتایی لەبارەی هەناردەی نەوتەوە سەردانی بەغداد بكات.
هەناردەی نەوتی هەرێمی كوردستان لە 25-3-2023 لەلایەن توركیاوە ڕاگیرا، پاش ئەوەی كە ئەنقەرە سكاڵایەكی لەوبارەیەوە لە دادگای نێودەوڵەتیی ناوبژیوانیی پاریس بە بەغداد دۆڕاند.
بڕیارەكەی دادگای پاریس، حكومەتی هەرێمی ناچار كرد بە ڕادەستكردنی نەوت بە بەغداد و هەناردەكردنی لە ڕێگەی كۆمپانیای بەبازاڕكردنی نەوتی عێراق (سۆمۆ) ڕازی ببێت. لە ماوەی نزیكەی پێنج مانگی ڕابردوویشدا، بەهۆی ڕاگرتنی هەناردەی نەوتەوە، ملیاران دۆلار زیان بە هەرێمی كوردستان گەیشتووە.