قوباد تاڵەبانی: نابێت لەپێناو بەرژەوەندی چەند کەسێک پرۆسەی چاکسازی لە هێزەکانی پێشمەرگە پەک بخرێت

پەرەگراف

قوباد تاڵەبانی ڕایگەیاند، بەردەوام دەبن لە چاکسازی لە وەزارەتی پێشمەرگەو هەر کەسێک کەمتەرخەم بێت لێپرسینەوەی لەگەڵدا دەکرێت.

"بەڵێنمان بە خەڵکی خۆمان و هاوپەیمانەکانیشمان داوە کە؛ هێزەکانمان تۆکمەتر و راهێنراوتر بکەین و قۆناغ بە قۆناغ پڕۆژەی چاکسازی جێبەجێ بکەین، هەربۆیە ناکرێت لەپێناو بەرژەوەندی هەندێک کەس، دەستبەرداری بابەتێکی وەها هەستیار و گرنگ بین. ئێمە بەردەوام دەبین لە پڕۆسەی چاکسازی و لێپرسینەوەش لە کەسانی کەمتەرخەم دەکەین لە هەر پلەو پۆستێکدا بن" قوباد تاڵەبانی وادەڵێت.

ئەو وتانەی، جێگری سەرۆک وەزیران لە کۆبوونەوەیدا بووە لەگەڵ لیوا روکن بەختیار ئەمینداری گشتی وەزارەتی پێشمەرگە و ژمارەیەک لە ئەفسەران و پلەداری وەزارەت کە ئەمڕۆ لە ھەولێر بەڕێوەچووە.

بەپێی ڕاگەیەندراوی کۆبوونەوەکە؛ تاوتوێی دواپێشهات و گرژی و ناکۆکییەکانی ناو دیوانی وەزارەت کراوەو لەسەر داوای قوباد تاڵەبانی، ئەمینداری گشتی وەزارەتی پێشمەرگە باسی لە گرژییەکان و هۆکارەکانی کرد و هەروەها روونکردنەوەی داوە لەبارەی چۆنییەتی بەڕێوەچوونی قۆناغەکانی چاکسازی لە وەزارەتی پێشمەرگە و کێشە و کەموکوڕییەکانی پڕۆسەکەی خستەڕوو.

قوباد تاڵەبانی لە کۆبوونەوەکەدا جەختی کردووەتەوە لەسەر بەردەوامیدان بە پڕۆسەی چاکسازی و رێکخستنەوەی هێزەکانی پێشمەرگە و رایگەیاند "ئاساییە گرژی و ناکۆکی سیاسی هەبێت لەنێوان لایەنە سیاسییەکان بەڵام قبوڵ کراو نییە ئەو گرژییە بهێنرێتە ناو وەزارەتی پێشمەرگە".

جێگری سەرۆک وەزیران لە کۆبوونەوەکەدا پەیامێکی بۆ هەموو بەرپرسان و پلەدارانی وەزارەتی پێشمەرگە ناردووە، دەڵێت "لەڕووی سیاسیو حیزبییەوە سەر بە هەر لایەنێکن، لەڕووی نیشتمانی و ئەخلاقییەوە ئەرکی ئێوەیە لە وەزارەت پیشەییانە مامەڵە بکەن و دووربکەونەوە لەململانێ و نەبنە بەشێک لە ناکۆکی سیاسی و حیزبی و مل نەدەن بۆ هیچ دەستێوەردانێک لە وەزارەتی پێشمەرگە لەلایەن هەر کەسێکەوە بێت".

لە ماوەی ڕابردوودا ململانێكانی نێوان پارتی و یەكێتی لەناو وەزارەتی پێشمەرگە گەیشتنە لووتكە، باسكردنی ئەو ململانێیانە لە نووسراوی فەرمیدا و بڵاوكردنەوەی نووسراوەكە لە میدیاكان، زیاتر كێشەكانی دەرخست.

بەپێی ڕاپۆرتێكی بنكۆڵكاریی پەرەگراف، هەوڵەكانی هاوپەیمانان لەگەڵ پارتی و یەكێتی بۆ ڕێكخستن و یەكخستنی هێزەكانی پێشمەرگە لەچەند ساڵی ڕابردوودا، بێ‌ ئاكام بوون و ئەنجامی دڵخۆشكەریان لێ‌ نەكەوتووەتەوە.

پەرەگراف لە بنكۆڵكارییەكەیدا زانیاریی وردی لە چەندین سەرچاوەوە وەرگرتووە و بەپێی زانیارییەكان، پارتی و یەكێتی نەك ملكەچی فشاری بەردەوامی هاوپەیمانان بە سەركردایەتی ئەمریكا نەبوون، بەڵكو هەردوو حزب هیچ بایەخ و دەسەڵاتێكیان بۆ وەزارەتی پێشمەرگە نەهێشتووەتەوە و حیزبایەتییان لەناو هێزە چەكدارەكاندا زیاتر كردووە.

"هاوپەیمانان دەڵێن: نابێت حیزبایەتی هەبێت. بەڵام یەكێتی و پارتی زیاتر حزبایەتی دەكەن و هیچ متمانەیەك لە نێوانیاندا نەماوە، وەزارەتی پێشمەرگەیان پشتگوێ خستووە و پەرە بە هێزی حیزبی دەدەن"، یەكێك لە سەرچاوەكان وا دەڵێت.

لە ماوەی ڕابردوودا كێشەكانی نێوان پارتی و یەكێتی لەسەر دابەشكردنی پۆستەكانی وەزارەتی پێشمەرگە قووڵ بوونەوە، پارتی هەوڵ دەدات ڕێككەوتنی پێشوویان بۆ دابەشكردنی پۆستەكان 50 بە 50 هەڵبوەشێنێتەوە و لەسەدا 57ی پۆستەكان بۆ خۆی و 43 بۆ یەكێتیبێت، بەڵام یەكێتی ئەوە ڕەت دەكاتەوە.

لیوا ڕوكن بەختیار محەمەد، ئەمینداری گشتیی وەزارەتی پێشمەرگە لە پشكی یەكێتی، لە نووسراوكێدا كە ئاراستەی وەزیری دارایی كردووە،ئاشكرا دەكات كە لە ڕۆژی 11-6-2023، عەبدولخالق باپیری، بریكاری وەزارەتی پێشمەرگە، فەرمانێكی وەزاریی دەركردووە و تێیدا باسلەوە كراوە "چیتر لە وەزارەت كار بە دابەشكاریی 50 بە 50 ناكرێت".

ئەمینداری گشتیی وەزارەتی پێشمەرگە لە پشكی یەكێتی، فەرمانەكەی ڕەت كردووەتەوە و دەڵێت "هیچ بنەمایەكی یاسایی و كارگێڕیی نییەو كاری پێ‌ ناكرێت".

لیوا ڕوكن بەختیار محەمەد لە نووسراوەكەیدا بۆ وەزیری دارایی، سەبارەت بە بارودۆخی ناو وەزارەتی پێشمەرگە دەڵێت "ڕێز و حورمەت لەپەیامی پێشمەرگایەتی نەماوە، كاری پێكەوەیی و هاوبەش و پرس و ڕا بە یەك كردن نەماوە، ڕێز بۆ یاسا و پەیڕەوی ناوخۆی وەزارەت نەماوەو پێشێل دەكرێت".

ئەمینداری گشتیی وەزارەتی پێشمەرگە لە پشكی یەكێتی، كرۆكی ناكۆكی و ململانێكانی نێوان پارتی و یەكێتیی لەناو وەزارەتی پێشمەرگەئاشكرا كردووە و دەڵێت "سەرجەم ئیش و كارەكانی ژمێریاریی سەربازی بە شێوەیەكی تاكلایەنە بەڕێوە دەبرێن، ئەویش تەنیا لەلایەنبرادەرانی لیستی 80، بە تایبەت لە بەڕێوەبەرایەتیی مووچە".

بابەتێكی دیكە گۆڕینی پاسۆردی كۆمپیوتەرەكانی نوێنەرەكانی یەكێتی لەناو وەزارەتی پێشمەرگەیە لەلایەن بەرپرس و نوێنەرەكانی پارتییەوە،كە بە قسەی لیوا ڕوكن بەختیار محەمەد "لە بەڕێوەبەرایەتیی مووچە/ بەشی مووچە، بۆ ئامادەكردنی مووچەی مانگی حەوت، تەواوی ئەفسەرو كارمەندەكانی لیستی 70 پاسۆردی كۆمپیوتەرەكانیان گۆڕدراوە و سڕ كراون، ڕێگە نادرێت كارەكانیان جێبەجێ‌ بكەن. گشت كارەكانلەلایەن ئەفسەر و كارمەندەكانی خۆیان جێبەجێ‌ دەكرێن".