ئەمڕۆ پێنج ئۆتۆمبێل لە هەولێر سووتان؛ بەرگریی شارستانی: خراپیی بەنزین هۆكاری سەرەكییە
پەرەگراف
هاتووچۆی هەولێر سووتانی "پێنج ئۆتۆمبێل"ی تەنیا لەمڕۆدا لە سنووری پارێزگاكە ڕاگەیاند. بەرگریی شارستانیش "خراپیی بەنزین" بە هۆكاری سەرەكیی سووتانی ئۆتۆمبێل ناو دەبات.
بەپێی ئامارێك كە بەرگریی شارستانیی هەولێر خستوویەتیە ڕوو، تەنیا لەمساڵدا "172 ئۆتۆمبیل" سووتاون. ئەو فەرمانگە پەیوەندیدارە دەشڵێت "بەداخەوە خراپیی بەنزین و بەرزیی ڕێژەی غاز لەناو بەنزینەكە، هۆكاری سەرەكین بۆ سووتان".
ئەمڕۆ ژمارەیەك ئۆتۆمبێل لە چەند شوێنێكی هەولێر، لەوانە شەقامی 150 مەتری، بنەسڵاوە، لەسەر ڕێگاكانی هەولێر – كۆیە و هەولێر – شەقڵاوە، سووتان. بەرگریی شارستانیی هەولێر دەڵێت "چوار ئۆتۆمبێل" سووتاون، بەڵام وتەبێژی هاتووچۆی هەولێر دەڵێت "پێنج ئۆتۆمبێل سووتاون".
سەبارەت بە هۆكاری سووتانی ئۆتۆمبێلەكان، بەرگریی شارستانیی هەولێر ڕایگەیاند "دوو ئۆتۆمبیل بەهۆی لێچوونی بەنزین، دوو ئۆتۆمبیل بەهۆی فیول پەمپەوە سووتاون".
هاوكات فازڵ حاجی، وتەبێژی پۆلیسی هاتووچۆی هەولێر، دەڵێت "بەپێی ڕاپۆرتی بەرگریی شارستانی، دوو ئۆتۆمبێل بەهۆی لێچوونی بەنزینەوە سووتاون كە لە دەمی خاوەنی ئۆتۆمبێلەكانەوە وەرگیراوە. ئۆتۆمبێلێكیش بەهۆی گۆڕینی فیول پەمپەوە سووتاوە كە بەبێ ئەوەی سەری پاتری لاببرێت دەستكاری كراوە و لە كاتی لێكردنەوە شۆرت دروست بووە".
وەكوو فازڵ حاجی باسی كردووە، ئۆتۆمبێلی چوارەم بەهۆی "غازی بەنزینی خراپ"ـەوە سووتاوە و پێنجەمیش هێشتا هۆكارەكەی دیار نییە.
وتەبێژی هاتووچۆی هەولێر هۆشداری دەدات كە "پشتگوێخستنی بچووكترین كەموكووڕی، ئەگەری گەورەترین كارەساتی لێ دەكەوێتەوە".