مامۆستایان و فەرمانبەرانی زانكۆی سلێمانی گردبوونەوەیان ئەنجام دا و سێ داواكارییان خستە ڕوو
پەرەگراف
ئەنجوومەن و ستافی ناڕازیی مامۆستایان و فەرمانبەرانی زانكۆی سلێمانی، دەسەڵات لە هەرێمی كوردستاندا بە "دەسەڵاتێكی تاڵانكار" وەسف دەكات و دەڵێت "ئەم جۆرە دەسەڵاتەش كار لەسەر بەكۆیەلەكردنی كۆمەڵگا دەكات و یەكێكیش لە میكانیزمەكانی كۆیلەكردن، هەژاركردنی كۆمەڵگایە". بۆ ڕووبەڕووبوونەوەی ئەو سیاسەتی بەكۆیلەكردنەش، ئەنجوومەنەكە ئەمڕۆ "ڕۆژی سلێمانی بۆ كۆتاییهێنان بە كۆیلایەتی"ی ڕاگەیاند و داوای "هەماهەنگی و كاری پێكەوەیی" لە نەتەوە یەكگرتووەكان دەكات.
مامۆستایان و فەرمانبەرانی ناڕازیی زانكۆی سلێمانی ئەمڕۆ لە گردبوونەوەیەكدا ژمارەیەك داواكارییان خستە ڕوو كە دیاترینیان بریتییە لە "پێدانی مووچە هەموو 30 ڕۆژ جارێك و لە هەمان بەروارەكانی دابەشكردنی مووچە لەلایەن حكومەتی ناوەنی عێراقەوە".
دوو داواكاریی دیكەی مامۆستایان و فەرمانبەرانی ناڕازیی زانكۆی سلێمانی "دیاریكردنی میكانیزمێكی كرداریی دادگەرانە بۆ گەڕاندنەوەی مووچە پاشەكەوتكراوەكان و دەستپێكردنەوەی پلەبەرزكردنەوەی وەزارەتە خزمەتگوزارییەكان هاوتای هێزە چەكدارەكان و هەندێك چین و توێژی دیكەی ناو حكومەت"ن.
ئەنجوومەن و ستافی ناڕازیی مامۆستایان و فەرمانبەرانی زانكۆی سلێمانی دەڵێت "پاشەكەوتكردن و لێبڕینی بەشێك لە مووچەی فەرمانبەران و وەستاندنی پلەبەرزكردنەوەی وەزارەتە خزمەتگوزارییەكان، بە زۆرەملێ و نایاساییانە، ئامڕازەكانی هەژاركردنی كۆمەڵگان".
هەروەها ئاماژەیان بەوە كرد، سەرباری ئەوەش بە "نایاسایی" چەندان جۆر باج و ڕسوومات زیاد كراون، ئەمەش بووەتە هۆی ئەوەی "لە نێوان ساڵەكانی ئابووریی سەربەخۆ و ئێستادا، توانای كڕینی هاوڵاتییان، بەنزیكەیی، بە ڕێژەی ٥١% دابەزیوە".