پەرەگراف
بە بڕیاری وەزیری ناوخۆی هەرێم، ئەو شوێنە گەشتیارییانەی كە لە ماوەی ڕابردوودا هاووڵاتی و گەشتیاریان تێدا خنكاوە، دادەخرێن. هەڵمەتی داخستنی ئەو شوێنانە و لێدانی شریتی سوور بۆ قەدەغەكردنی مەلەكردن تێیاندا دەستی پێ كردووە.
ڕاگەیاندنی وەزارەتی ناوخۆی حكومەتی هەرێمی كوردستان دەڵێت "دوای زیادبوونی ڕووداوەكانی خنكانی هاووڵاتیان و گەشتیاران لە ڕووبار و دەریاچە، زێ، چەمەكان، لە وەرزی هاویندا، بە فەرمانی وەزیری ناوخۆ، بەڕێوەبەرایەتییەكانی بەرگریی شارستانی و پۆلیس ئەو شوێنە گەشتیارییانە دادەخەن كە لە ماوەی ڕابردوو هاووڵاتییان و گەشتیاران لێیان خنكاون و مەترسیدارن بۆ مەلەكردن".
وەزارەتەكە ڕایگەیاندووە، ئامانج لەو بڕیارە "كەمكردنەوەی دەرفەت و ئەگەرەكانی قوربانیی زیاتر"ـە.
هاوكات ئاماژەی بەوەش كردووە كە دەستەی گشتی گەشتوگوزار و دەستەی پاراستن و چاككردنی ژینگە و فەرمانگەی میدیا و زانیاری و ناوەندی هاوبەشی هەماهەنگیی قەیرانەكان و دامەزراوە پەیوەنددارەكانی دیكە، هەڵمەتی ئاگاداركردنەوە و هۆشیاركردنەوەی هاووڵاتییان و گەشتیاران بۆ خۆپاراستن لە مەلەكردن لەو شوێنە مەترسیدارانە دەست پێ دەكەن.
"داوا لە هاووڵاتییانی ئازیز و گەشتیاران و كۆمپانیاكانی گەشتوگوزار دەكەین كە پابەند بن بە دووركەوتنەوە لەو شوێنانەی شریتی سووری لێ دراوە و هێما و تابلۆكانی قەدەغەكردنی مەلەی لێ هەڵواسراوە. ئەو شوێنانە مەترسیدارن و بە هیچ شێوەیەك ناكرێت مەلەی تێدا بكرێت و بۆ مەلەكردن ناشێن و ڕێگاپێدراو نین"، ڕاگەیاندنی وەزارەتی ناوخۆ وا دەڵێت.
ڕۆژانە هەواڵی خنكانی هاووڵاتی و گەشتیار لە ناوچە گەشتیارییەكانی هەرێم بڵاو دەبێتەوە، نوێترین گیانلەدەستدانی دوو هاووڵاتییە لە دوو كاتی جیادا و لە یەك شوێن لە ماوەی كەمتر لە یەك هەفتەدا، ئەویش خنكانی هاووڵاتییەكی شاری هەولێر و گەنجێكی دانیشتووی ڕانیە بوون لە كاتی مەلەكردن لە دەربەندی ڕانیە.