پەرەگراف
بەپێی نوێترین ئامار كە دەستەی ئاماری هەرێمی كوردستان بڵاوی كردووەتەوە، ژمارەی دانیشتووان لە هەرێم گەیشتووەتە شەش ملیۆن و 556 هەزار و 752 كەس. ئەم ئامارە ورد و تەواو دروست نییە، بەڵكو وەكوو دەستەكە خۆی دەڵێت "بەپێی خەمڵاندن و پێشبینی"ی خۆیانە. ڕێژەی گەشەی دانیشتووانیش بۆ ساڵی ٢٠٢٣ بە 2% دەخەمڵێندرێت.
ڕۆژی 11-7ی هەموو ساڵێك بە ڕۆژی دانیشتووان لە لایەن نەتەوەیەكگرتووەكانەوە دیاری كراوە، بە ئامانجی كار و چالاكی لەو ڕۆژەدا تایبەت بە دانیشتوان و ئمار و كێشەكانی.
وەكوو لە ڕاگەیەندراوی دەستەی ئاماری هەرێمی كوردستاندا هاتووە، لەو ژمارەیە سێ ملیۆن و 296 هەزار و 240 كەس لە ڕەگەزی نێر و سێ ملیۆن و 260 هەزار و 514 كەسیش لە ڕەگەزی مێن.
هەروەها زیاتر لە سێ لەسەر چواری دانیشتووانی هەرێم لە شارەكاندا نیشتەجێبوون، كە بەپێی ئامارەكە ژمارەی ڕێژەی شارنشین لە هەرێم 78.4% و ڕێژەی گوندنشین 21.6%ـە.
دەستەی ئاماری هەرێمی كوردستان دەڵێت "لە ساڵی ٢٠١٤ بە دواوە عێراق چەندین قەیرانی كەڵەكەبووی بە خۆیەوە بینیوە كە بوونەتە هۆی گۆڕانكاری لە پرۆفایلی دیموگرافیی وڵات. چەندین گۆڕانكاریی گەورە لەسەر دانیشتوان ڕوویان داوە، لەوانە گەشەی دانیشتوان، دابەشبوون، پێكهاتەی تەمەن، بەپیتبوون، مردن، جووڵەی دانیشتووان، بەتواناكردنی ئافرەتان، هێزی كار و چەندین بابەتی تر".
دەستەكە ئاماژەی بە كاریگەرییەكانی كۆرۆنا و ململانێی درێژخایەن لە عێراق لەسەر دانیشتووان كردووە و دەشڵێت "كاریگەریی نەرێنیی كردووەتە سەر ئاسۆی ئابووریی وڵات، بە هەرێمی كوردستانیشەوە".