ڕسوومات و گرانبوونی پێداویستی هۆكارن؛ لە ساڵێكدا نزیكەی 100 نانەواخانە و سەموونخانە لە دهۆك داخراون
پەرەگراف - عەممار عەزیز لە دهۆک
بەهۆی زیادكردنی ڕسوومات لەسەر سەموونخانە و نانەواخانەكان، هەروەها گرانیی پێداویستییەكانی دروستكرنی نان و سەموون، لە ماوەی ساڵێكدا لە دهۆك نزیكەی 100 نانەواخانە و سەمونخانە داخراون
نێچیرڤان دۆسكی، زیاتر لە چوار ساڵە نانەواخانەیەكی لە ناوچەی ئیمینكێی سەر بە پارێزگای دهۆك كردووەتەوە، موڵەتی نانەواخانەكەی لە مانگی 9ی 2022 بەسەر چووە و دەبێت نویێ بكەمەوە، بەڵام بە پەرەگرافی وت "بەهۆی زیادكردنی ڕسوومات، تا ئێستا نوێم نەكردووەتەوە، چونكە دەزانم پارەیەكی زۆری تێ دەچێت تا نویێ دەكەمەوە".
نێچیرڤان دۆسكی وتیشی "جگە لە زیادكردنی ڕسوومات، ئیدارەی پارێزگای دهۆك كۆمەڵێك بەڵێنیان بە ئێمە دا كە هاوكاریمان بكەن، بەڵام هیچیان جێبەجێ نەكردوون".
ئەیاز سدیق، نوێنەری خاوەنی فڕن و نانەواخانەكانی دهۆك، بۆ پەرەگراف دەڵێت "تەنها نوێكردنەوەی موڵەتی ساڵانە 500 هەزار دیناری چووەتە سەر، بە جۆرێك لە 150 هەزار دینارەوە بۆ نزیكی 700 هەزار دینار بەرز بووەتەوە".
كێشەیەكی دیكەی خاوەنی نانەواخانە و سەموونخانەكانی دهۆك، ڕۆتیی نوێكردنەوەی مۆڵەتی كاركردنە، كە وەكوو نوێنەری خاوەنی فڕن و نانەواخانەكانی دهۆك دەڵێت، پێشتر "بە دوو ڕۆژ تەواو دەبوو، ئێستا ژمارەی ئەو فەرمانگانەی كە دەبێت سەردانی بكەن زۆر زیاد یادبوون و نوێكردنەوەی مۆڵەت دوو حەفتەی پێ دەچێت".
"سەرەڕای زیادكردنی ڕسوومات و ڕۆتین، ئارد، زەیت و تەواوی پێداویستییەكانی تر گران بوون، ئەمەش وای كردووە كە خاوەنی فڕن و نانەواخانەكان بیر لە داخستن بكەنەوە، بە جۆرێك لە ماوەی ساڵێكدا نزیكەی 100 فڕن و سەموونخانە لەلایەن خاوەنەكانیانەوە داخراون"، ئەیاز سدیق وای وت.
بەپێی ئامارێك كە پەرەگراف لە بەشی سەموونخانە و نانەواخانەكان لە بەڕێوەبەرایەتیی دانەوێڵەی دهۆك دەستی كەوتووە، لە سنووری پارێزگای دهۆك 535 سەموونخانە لەگەڵ 845 نانەواخانە بە فەرمی تۆمار كراون.
هەڤاڵ سوبحی، بەرپرسی بەشی سەموونخانە و نانەواخانەكان لە بەڕێوەبەرایەتیی دانەوێڵە لە دهۆك بە پەرەگرافی وت "ئێمە كە سەر بەوەزارەتی بازرگانیی حكومەتی هەرێمین، مۆڵەتی كردنەوە و نوێكردنەوەی ساڵانەی سەموونخانە و نانەواخانەكان لای ئێمە و تەنها 100 هەزار دینارە، لە 2017وە تا ئێستا نەگۆڕاوە".
بەڵام لە بەڕێوەبەرایەتییەكانی دیكەش ڕسوومات لە خاوەنی سەمونخانە و نانەواخانەكان وەردەگیرێت. هەڤاڵ سوبحی دەڵێت "ئێمە نازانین لە بەڕێوەبەرایەتی و دام و دەزگاكانی تر ڕسوومات چ گۆڕانكارییەكی بەسەردا هاتووە، هەر وەزارەت و دەزگایەكی حكومی، پلانی تایبەت بە زیادكردنی داهاتی خۆی هەیە".