پەرەگراف
ئاسایشی ڕاپەڕین دوو باندی بازرگانیی ماددەی هۆشبەری بە دەیان كیلۆگرام ماددەی هۆشبەرەوە دەستگیر كرد.
ئاسایشی ڕاپەڕین لە ڕاگەیەندراوێكدا دەڵێت "بەشی ماددە ھۆشبەرەكانی بەڕێوەبەرایەتیی ئاسایشی ڕاپەڕین بە پشتبەستن بە زانیاری و بەدواداچونی ورد، دوای وەرگرتنی ڕەزامەندیی دادوەری دادگای لێكۆڵینەوەی ڕانیە، دوو چالاكی گرنگی بە ئەنجام گەیاند".
چالاكیی یەكەم لە ڕۆژی 12-4-2023 بووە، كە "دوو تۆمەتبار بە چەند جۆر و بڕێكی جیاوازی ماددەی ھۆشبەرەوە" لە سنوری ئیدارەی ڕاپەڕین دەستگیر كراون و یەكێك لە گومانلێكراوان دانیشتووی شاری ھەولێرە.
بەپێی ڕاگەیەندراوی ئاسایش، "بڕی هەزار گرام ماددەی هۆشبەر لە جۆری ھێرۆین، ١٥٠٠ گرام تریاك، ٥٠٠ گرام ماریجوان و ٥٠ گرام كریستاڵ، هەروەها ئامێری پێوانەكردن و كەلوپەلی بەكارهێنانی ماددە هۆشبەرەكان" دەستی بەسەردا گیراوە.
چالاكیی دووەم لە ڕۆژی 9-4-2023 بووە، كە تێیدا ئاسایش "دەستی بەسەر بڕی (٥٦) كیلۆگرام ماددەی هۆشبەر لە جۆری كریستاڵ بە شێوەی شاراوە لەناو (١٧ قتوی كەتیرە)دا گرتووە".
ئاسایشی ڕاپەڕین دەڵێت "ئەو ماددە هۆشبەرە ئامادە كرابوو بنێرێتە دەرەوەی هەرێمی كوردستان".