مەسرور بارزانی لەگەڵ كۆمپانیا نەوتییەكان كۆدەبێتەوە؛ ڕێكارە نوێیەكانی هەناردەكردنی نەوتیان بۆ ڕوون دەكاتەوە
پەرەگراف
ئاژانسی هەواڵی ڕۆیتەرز ئاشكرای دەكات، سەرۆكی حكومەتی هەرێم بۆ گفتوگۆ لەسەر ئامادەكارییەكان بۆ دەستپێكردنەوەی هەناردەكردنی نەوتی هەرێم و مەرج و بڕیارەكانی پەیوەست بە نرخی نەوتی خاو لە ڕێی سۆمۆوە، لەگەڵ كۆمپانیا نەوتییەكان كۆدەبێتەوە.
كۆبوونەوەكە ئەمڕۆ لە شاری هەولێر بەڕێوە دەچێت و تێیدا مەسرور بارزانی "میكانیزمی پێشنیازكراو بۆ دانەوەی قەرزی كۆمانیا نەوتییەكان و پشكیان لە فرۆشی هەناردەی نەوت لە ئایندەدا" بۆ كۆمپانیاكان ڕوون دەكات.
بەپێی زانیارییەكانی ڕۆیتەرز، حكومەتی عێراق و حكومەتی هەرێم بابەتە تەكنیكییە بنەڕەتیەكانیان بۆ دەستپێكردنەوەی هەناردەی نەوت بۆ بەندەری جەیهانی توركی چارەسەر كردووە .
بەپێی ئەو گرێبەستەی كۆمپانیای سۆمۆ لەگەڵ بازرگانەكان واژووی دەكات، نرخی نەوتی هەرێم هاوشێوەی نرخی نەوتی كەركووك دەبێت و حكومەتی هەرێمیش پابەند دەكرێت كە نەوتەكەی بە ئاسیا بفرۆشێت.
لەگەڵ ئەوەی كە حكومەتی هەرێم و حكومەتی عێراق گەیشتوونەتە ڕێككەوتن و ڕێكارە هونەرییەكان بۆ هەناردەكردنەوەی نەوتی هەرێم بەرەو كۆتایی دەچن، بەڵام هێشتا كاتی دەسپێكردنەوەی نەوتی هەرێم دیار نییە.