پەرەگراف
ئەنجوومەنی وەزیرانی عێراق لە كۆبوونەوەی ئەمڕۆ ژمارەیەك بڕیاری دەركرد، دیارترینیان دامەزراندنی سەرجەم مامۆستایانی وانەبێژ و فەرمانبەرانی گرێبەستی كۆمیسیۆنی هەڵبژاردن بوو كە چەند ساڵە چاوەڕێن ڕاژەكانیان بكرێت بە هەمیشەیی.
بەپێی ڕاگەیەندراوی نووسینگەی ڕاگەیاندنی محەمەد شیاع سوودانی، سەرۆكوەزیرانی عێراق، لە كۆبوونەوەكەدا بڕیار دراوە جگە لە سەرجەم مامۆستایانی وانەبێژ، سەرجەم فەرمانبەرانی گرێبەستی سەر بە وەزارەتی پەروەردەیش دابمەزرێندرێن.
هەر لە كۆبوونەوەكەدا بڕیار دراوە سێ هەزار و 193 فەرمانبەری گرێبەستی كۆمیسیۆنی باڵای سەربەخۆی هەڵبژاردنەكان ڕاژەكانیان بكرێن بە هەمیشەیی، بڕیارەكە ئەو كەسانە دەگرێتەوە كە پێش 2-10-2019 گرێبەستیان لەگەڵ كراوە.
ئەنجوومەنی وەزیرانی عێراق بڕیاریشی دا پلەی وەزیفی بۆ گرێبەستەكانی سەرجەم وەزارەتەكان دابنرێت، بەو شێوەیەی لە یاسای ئاسایشی خۆراكدا هاتووە و لەناو پرۆژەیاسای بوودجەی 2023دا جێگیر دەكرێت.
سەبارەت بەو كارمەندانەیش كە گرێبەستن لە كۆمپانیاكانی سەر بە وەزارەتی نەوت، ئەنجوومەنی وەزیرانی عێراق ڕەزامەنیی نیشان دا كە وەزارەتی دارایی 11 هەزار و 31 پلەی وەزیفی دابنێت بۆ كردن بە هەمیشەیی ئەو كارمەندانە. ئەو كارمەندانەیش كە بە كرێی ڕۆژانە لە وەزارەتی نەوت كار دەكەن، دەكرێن گرێبەست.
هەر لە كۆبوونەوەی ئەمڕۆی ئەنجوومەنی وەزیرانی عێراقدا بڕیار درا بەشەخۆراكی مانگانەی بەڕێوەبەرە گشتییەكان و ئەوانەی پلەیان بەرەو سەرترە، لەگەڵ ئەو كەسانەی مووچەكەیان لە سەرووی دوو ملیۆن دینارەوەیە، ببڕدرێت.
لە ساڵی 1975ـەوە خەڵكێكی زۆر لە سنووری شنگال خانوویان بەناوەوە نەكراوە، بەهۆی سیاسەتەكانی دەسەڵاتی پێشووی عێراقەوە. ئەمڕۆ ئەنجوومەنی وەزیرانی عێراق ڕەزامەندیشی نیشان دا لەسەر بەناوكردنی خانوو و كۆمەڵگەكانی خانەسۆر، دووگرێ، بۆرك، كۆهبل، تەل قەسەب، تەل عوزێر، سیپا شێخدری و كرزرك لە سنووری شنگال.