پەرەگراف دەقی پرۆژەیاسا توندەكەی سەدر بۆ قەدەغەی پەیوەندی لەگەڵ ئیسرائیل بڵاو دەكاتەوە

پەرەگراف

بەپێی پرۆژەیاسایەك كە ڕەوتى سەدر ئامادەى کردووە بۆ بە تاوانكردنی پەیوەندی لەگەڵ ئیسرائیل، توندترین سزا كە "لەسێدارەدان و زیندانیکردنی هەتاهەتایی"ـە، بەسەر هەر كەسێكدا دەسەپێندرێت كە پەیوەندی لەگەڵ "قەوارەی ئیسرائیل" دروست بكات..

پرۆژەیاسای "قەدەغەكردنی گەشت و دروستكردنی پەیوەندی لەگەڵ قەوارەی زایۆنیی ئیسرائیل" كە پەرەگراف دەقەكەی بە كوردی و عەرەبی بڵاو دەكاتەوە، هەر جۆرە پەیوەندییەك لەگەڵ ئیسرائیل و باڵیۆزخانە و دامودەزگا و ڕێكخراو و كەسێكی سەر بەو وڵاتە لە ناوخۆی عێراق و دەرەوەی عێراقیش قەدەغە دەكات.

سزاكانی دروستكردنی پەیوەندی لەگەڵ ئیسرائیل جگە لە هاووڵاتیانی عێراقی لە ناوخۆ و دەرەوە، هەر هاووڵاتییەكی بیانییش دەگرێتەوە كە لەناو خاكی عێراقدا دەژی.

دوایین ماددەی پرۆژەیاساكە دەڵێت "ئەم یاسایە هەڵناوەشێنرێتەوە و هەمواریش ناكرێتەوە، تەنیا بە دەنگی دوو لەسەر سێی ئەندامانی ئەنجوومەنی نوێنەران نەبێت. كار بە هیچ دەقێك ناكرێت كە پێچەوانەی بەندەكانی ئەم یاسایە بێت".

بەپێی تویتەكەی سەدر و كۆنگرە ڕۆژنامەوانییەكەی كوتلەی سەدری لەگەڵ پارتی و سوننەكان، لە یەكەم دانیشتنی پەرلەمان لە دوای جەژنی ڕەمەزان، پرۆژەیاساكە دەخرێتە بەرنامەی كارەوە.

موقتەدا سەدر، ڕێبەری ڕەوتی سەدر، ماوەیەك لەمەوبەر لە تویتێكدا ڕایگەیاند "پرۆژەیەك دەدەینە پەرلەمان بۆ بەتاوانكردنی ڕێككەوتن و مامەڵەكردن لەگەڵ ئیسرائیل".

سەدر وتیشی "یەكێك لەو ھۆكارانەی وای كردووە ڕەوتی سەدر بخاتەوە ناو سیاسەت، پرسی ئاشتی و ڕێككەوتنە لەگەڵ ئیسرائیل".

دەقی پرۆژەیاساكە بە زمانەكانی عەرەبی و كوردی:

یاسای قەدەغەكردنی گەشت و دروستكردنی پەیوەندی لەگەڵ قەوارەی زایۆنیی ئیسرائیل

ماددەی یەكەم: بۆ عێراقییەكان لە ناوخۆ و دەرەوەی وڵات و ئەو بیانییانەیش كە لەناو عێراقدا دەژین، قەدەغەیە گەشت بۆ خاكی ئیسرائیل بكەن، هەروەها قەدەغەیە سەردانی باڵیۆزخانە و دامەزراوەكانی تری ئەو قەوارەیە لە وڵاتانی دیكەی جیهان بكەن.

ماددەی دووەم: بۆ عێراقییەكان لە ناوخۆ و دەرەوەی وڵات و ئەو بیانییانەیش كە لەناو عێراقدا دەژین، قەدەغەیە هیچ جۆرە پەیوەندییەكیان لەگەڵ ئیسرائیل و نوێنەرانی هەبێت، ئەو پەیوەندییە لەگەڵ تاكەكەس یان دامەزراوە و ڕێكخراو بێت، لەژێر هەر ناونیشانێكی سیاسی، زانستی، بازرگانی، ئابووری، میدیایی، ئەمنی و هەر ناونیشانێكی دیكەدا بێت.

ماددەی سێیەم: بۆ عێراقییەكان لە ناوخۆ و دەرەوەی وڵات و ئەو بیانییانەیش كە لەناو عێراقدا دەژین، نابێت هیچ جۆرە پەیوەندییەكی سیاسی، دیپلۆماسی، ئابووری و هەر جۆرە پەیوەندییەكی دیكەیان لەگەڵ ئیسرائیلدا هەبێت.

ماددەی چوارەم: بۆ عێراقییەكان لە ناوخۆ و دەرەوەی وڵات و ئەو بیانییانەیش كە لەناو عێراقدا دەژین، قەدەغەیە بانگەشە بۆ هیچ بیروبۆچوون و ئایدۆلۆژیا و ڕەفتارێكی ئیسرائیلی و زایۆنی بكەن، بە هەر ئامرازێكی ئاشكرا یان نهێنی، بە هەر ڕێگەیەك بۆ نموونە: نووسراو، كتێب و هەر شتێكی دیكە.

ماددەی پێنجەم: بۆ عێراقییەكان لە ناوخۆ و دەرەوەی وڵات و ئەو بیانییانەیش كە لەناو عێراقدا دەژین، قەدەغەیە كار بۆ دامەزراوەی ئیسرائیلی بكەن، یاخود هاوكاریی ماددی و ئەدەبییان پێشكەش بكەن. هەر كارێك خزمەت بە ئامانجی ئیسرائیلی بكات، قەدەغەیە.

ماددەی شەشەم:
یەكەم: ئەنجامدانی ئەو كار و كردەوانەی كە لەو پێنج ماددەیەی سەرەوەدا قەدەغە كراون، بە تاوان دادەنرێت و سزاكەی لەسێدرەدان یان زیندانیكردنی هەتاهەتاییە.

دووەم: تۆمەتی ناپاكیی گەورە كە سزاكەی لەسێدارەدانە، دەدرێتە پاڵ سەرۆككۆمار و جێگرەكانی، سەرۆكوەزیران و جێگرەكانی، سەرۆكی ئەنجوومەنی نوێنەران و جێگرەكانی، ئەندامانی ئەنجوومەنی نوێنەران و وەزیر و وەكیل وەزیر و ئەو بەڕێوەبەرانەیش كە پلەی وەزیریان هەیە، ئەگەر هەر جۆرە پەیوەندییەك لەگەڵ ئیسرائیل دروست بكەن.

ماددەی حەوتەم: ئەو كەسەی كە تاوانبار دەكرێت بە ئەنجامدانی ئەو تاوانانەی لەم یاسایەدا هاتووە، سوود لە هیچ پاساو و دۆخێكی سووككردنی سزا (الظروف المخففة) وەرناگرێت كە لە یاسای ژمارە 111ی ساڵی 1969 یان هەر یاسایەكی دیكەدا هاتووە.

ماددەی هەشتەم:
أ‌- ئەم یاسایە هەڵناوەشێنرێتەوە و هەمواریش ناكرێتەوە، تەنیا بە دەنگی دوو لەسەر سێی ئەندامانی ئەنجوومەنی نوێنەران نەبێت.

ب‌- كار بە هیچ دەقێك ناكرێت كە پێچەوانەی بەندەكانی ئەم یاسایە بێت.