پەرەگراف
دوورخستنەوەی بەڕێوەبەری گشتیی پەروەردەی سلێمانی، پەیوەندیی بە دەستوەردانی حیزب لە كاروباری حكوومییەوە هەیە. گۆڕان جەخت دەكاتەوە "بڕیارەكە سیاسی و نایاساییە". نووسینگەی قوباد تاڵەبانییش ڕەتی دەكاتەوە لادانی دڵشاد عومەر "بڕیارێكی سیاسی" بێت، بەڵام هیچ پاساوێكی بۆ دوورخستنەوەی نەخستووەتە ڕوو.
لە كاتێكدا حیزبەكان بانگەشەی دوورخستنەوەی دەستی حیزب لە كاروباری حكوومی دەكەن، بە دەستوەردانی لایەنی دەسەڵاتداری سلێمانی، بەڕێوەبەری پەروەردەی دەربەندیخان لە دەرەوەی فەرمانی كارگێڕێی بەڕێوەبەری گشتیی پەروەردەی سلێمانی لە پۆستەكەی دانراوە. هاوكات هەر ئەوەش هۆكارێكی سەرەكیی لادانی بەڕێوەبەری پەروەردەی سلێمانییە لە پۆستەكەی كە ئامادە نەبووە فەرمانی دەستبەكاربوون بۆ ئەو كەسە دەربكات.
ڕۆژی 15-4-2019 دڵشاد عومەر، بەڕێوەبەری گشتیی پەروەردەی سلێمانی، نووسراوێكی ئاراستەی وەزیری پەروەردە كردووە كە تێیدا هاتووە "ئاگاداری بەڕێزتان دەكەین كە ڕۆژی 13-4-2019 لێپرسراوی ڕێكخستنی مەڵەبەندی سلێمانی (یەكێتی) داوای لە كۆمیتەی ڕێكخستنی دەربەندیخان كردووە ڕۆژی 14ی مانگ هەڵسن بە پەیوەندی نووسنی (هاوار حەمید مەجید) بە بەڕێوەبەری پەروەردەی دەربەندیخان".
بەڕێوەبەری گشتیی پەروەردەی سلێمانی ئاماژەی بەوە كردووە، ئەو كارە لە دەرەوەی فەرمانی كارگێڕیی ئەو ئەنجام دراوە، لە كاتێكدا بەڕێوەبەرایەتییەكەی (شاهۆ ئەحمەد حەسەن)ی بە وەكالەت كردووە بە بەڕێوەبەری پەروەردەی دەربەندیخان.
دڵشاد عومەر گرتنەبەری ئەو ڕێكارە حیزبییەی بۆ دانانی بەڕێوەبەری پەروەردەی دەربەندیخان بە "نایاسایی و نابەرپرسیارانە و بەزاندنی یاسا و ڕێنماییەكانی حكوومەتی هەرێم و دەستوەردانی ڕاستەوخۆ لە كاری حكوومەتداری" ناو بردووە و دەڵێت "ئەم حاڵەتە نایاساییانە ئەمە چەندین جارە دووبارە دەبێتەوە، وەكو لابردنی بەڕێوەبەری سابیس و دانانی یاریدەدەری زیاد".
بەڕێوەبەری پەروەردەی سلێمانی داوای لە وەزیری پەروەردە كردووە لە بەرانبەر ئەو دەستوەردانە ڕێكاری یاسایی بگیرێتە بەر.
هەروەها لە گرتەیەكی ڤیدیۆییدا دڵشاد عومەر لەبارەی كێشەی دانانی بەڕێوەبەری پەروەردەی قەزاكانی سلێمانی و بە تایبەتیش دەستوەردانی حیزبی لە كاروباری بەڕێوەبەرایەتییەكەی دەكات و دەڵێت "بەڕێوەبەری پەروەردەی دەربەندیخان بە پاڵپشتیی هەندێك بەرپرسی حیزبی و بە بێ فەرمانی كارگێڕیی من لەو پۆستەدا دانیشتووە. لە سەرۆكایەتیی وەزیران و وەزارەتی پەروەردە و پارێزگاری سلێمانی لەو پرسەدا باش نەهاتن بەدەممەوە".
لە بەرانبەردا هیچ ڕێكارێكی یاسایی لەوبارەیەوە نەگیراەتەبەر. تا ئەوەی ڕِۆژی 30-6-2019، بە پێچەوانەوە قوباد تاڵەبانی، جێگری سەرۆكی ئەنجوومەنی وەزیرانی هەرێم، فەرمانێكی بۆ "بەخشینی دڵشاد عومەر، بەڕێوەبەری پەروەردەی سلێمانی لە پۆستەكەی و گواستنەوەی ڕاژەی ناوبراو بۆ سەر میلاكی دیوانی وەزارەتی پەروەردە بە پلەی بەڕێوەبەری گشتی" دەركردووە. فەرمانیشی كردووە جێگرەكەی وەكو بەڕێوەبەری بەوەكالەت دەستبەكار بێت. بڕیارەكەش لە ڕۆژی 9ی ئەم مانگە لەلایەن وەزیری پەروەردەوە جێبەجێ كراوە.
فراكسیۆنی گۆڕان لە ئەنجوومەنی پارێزگای سلێمانی، لە كۆنگرەیەی ڕۆژنامەوانیدا بڕیاری قوباد تاڵەبانی بۆ لادانی دڵشاد عومەر لە پۆستی بەڕێوەبەری گشتیی پەروەردەی سلێمانی، بە "تەواو نایاسایی و تێپەڕاندنی دەسەڵاتی ئەنجوومەنی پارێزگا" ناوبرد.
فراكسیۆنەكە دەڵێت "ئەم بڕیارە پێچەوانەی حوكمەكانی ماددە و بڕگەكانی یاسای پارێزگاكان، ژ ۳ی ساڵی ۲۰۰۹ و دواتر پێچەوانەی ماددە و بڕگەكانی یاسای ژمارە ۳ی ساڵی ۱۹۹۲ی ئەنجوومەنی وەزیرانە".
فراكسیۆنی گۆڕان لە ئەنجوومەنی پارێزگای سلێمانی پاساوە یاساییەكانی لادانی بەڕێوەبەری گشتیی ڕوونكردووەتەوە كە بە "دەستپیسی، خراپ بەكارهێنانی پایەی فرمانەكەی بۆ مەرامی ماددی و شەخسی، بوون بە هۆی بەفیڕۆدانی دارایی گشتی" و دەڵێت "ئەو هۆیانە هیچی لە بەڕێوەبەری گشتیی پەرورەدی سلێمانیدا نییە".
لە وەڵامدا نووسینگەی قوباد تاڵەبانی بڕیارەكەی بە ڕێكارێكی ئیداریی تایبەت بە گواستنەوەی ڕاژە ناو بردووە و دەڵێت "بە هیچ شێوەیەك گواستنەوەی فەرمانبەر ناچێتە خانەی سزادانی ئیدارییەوە و ئەم بڕیارە سیاسی نییە".
نووسینگەی جێگری سەرۆكی ئەنجوومەنی وەزیرانی هەرێم ئاماژەی بەوە كردووە "بەپێی هەردوو بڕگەی ٢ و ٣ لە ماددەی ١٢ لە یاسای پارێزگاكانی هەرێم ژمارە ٣ی ساڵی ٢٠٠٩، دانانی بەڕێوبەری گشتی و لەسەر كار لادانی دەكەوێتە چوارچێوەی دەسەڵاتەكانی ئەنجوومەنی پارێزگاوە، نەك گواستنەوەی ڕاژەی بەڕێوەبەری گشتی كە ڕێكارێكی ئیدارییە و لە چوارچێوەی دەسەڵاتەكانی سەرۆكایەتیی ئەنجوومەنی وەزیران و وەزارەتی پەروەردەیە".
لە فەرمانەكەی قوباد تاڵەبانی و ڕوونكردنەوەی نووسنگەكەیدا، هیچ هۆكار و پاساوێكی یاسایی بۆ لادانی بەڕێوەبەری گشتیی پەروەردەی سلێمانی لە پۆستەكەی نەخراوەتە ڕوو.
لە دوای ئەو بڕیارە سەرۆكی فراكسیۆنی گۆڕان لە پەرلەمانی كوردستان ئەو هەنگاوەی قوباد تالەبانیی بە "نایاسایی و سزادانی سیاسی" ناو برد و ڕایگەیاند "ڕووبەڕووی هەر سزایەكی سیاسی دەبینەوە بەرانبەر هەر بەرپرسێك بكرێت".
دڵشاد عومەر لە چوارچێوەی ڕێككەوتنی نێوان یەكێتی و گۆڕان بۆ دابەشكردنی پۆستی حكوومەتە خۆجێییەكان ئەو پۆستەی وەرگرتبوو.