بافڵ تاڵەبانی: ئەو بڕیارانەی كاریگەرییان لەسەر چارەنووسی گەلەكەمان هەیە، نابێت تاكلایەنە بدرێن
پەرەگراف - لەبارەی ئەو ناكۆكییانەی لەسەر هەناردەكردنی نەوتی عێراق بە بۆریی هەرێم هاتووەتە ئاراوە، بافڵ تاڵەبانی، سەرۆكی یەكێتیی نیشتمانی، دەڵێت "نابێت ئەو بڕیارانەی كە كاریگەرییان لەسەر چارەنووس و ژیانی گەلەكەمان هەیە، بەشێوەیەكی تاكلایەنە بدرێن".
سەرۆكی یەكێتی لە پەیامێكدا جەختیش دەكاتەوە كە "حكومەتی هەرێمی كوردستان حكومەتێكی بنكەفراوانە و دەبێت هەموو لایەنەكان بەگوێرەی ئەوە هەڵسوكەوت بكەن".
پەیامەكەی بافڵ تاڵەبانی ئەوەی لێ دەخوێندرێتەوە كە ڕاگەیەندراوەكەی وەزارەتی سامانە سروشتییەكان بەبێ ڕەزامەندی و ئاگاداریی تیمی یەكێتی لە حكومەت، بڵاوكرابێتەوە. ئەو ڕاگەیەندراوەی سامانە سروشتییەكان و ڕەتكردنەوەی ڕێگەدان بە هەناردەكردنی نەوتی عێراق بە بۆریی هەرێمدا، نیگەرانیی شیعە و سوننەكانیشی بەدوای خۆیدا هێناوە.
بافڵ تاڵەبانی دەڵێت "ئێستا كاتی گرژی و ئاڵۆزی، یان تۆماركردنی خاڵی سیاسی نییە. خەڵكەكەمان شایەنی ئەوەیە كە ژیانێكی سەقامگیری هەبێت و لەكاتی خۆیدا مووچەكانیان وەربگرن. ئێستا كاتی یەكڕیزییە لە بەرامبەر ئەو مەترسییە گەورانەی كە دەكرێت تووشمان ببن".
"ئێمە پاڵپشتی لە دیالۆگی بنیاتنەرانە لەگەڵ هاوبەشەكانمان لە بەغداد و هەولێر دەكەین بۆ پاراستنی سەقامگیریی هەرێمی كوردستان و عێراق. لە هەمان كاتدا دڵنیاش بین كە خۆشگوزەرانیی هاووڵاتیانمان هەرگیز نەخرێتە مەترسییەوە"، سەرۆكی یەكێتیی نیشتمانی وا دەڵێت.
بەهۆی ڕاگرتنی هەناردەی نەوتی عێراق لە ئەنجامی داخستنی گەرووی هورمز، وەزارەتی نەوتی عێراق هەوڵێكی دەست پێ كردووە بۆ هەناردەكردنی 300 هەزار بەرمیل نەوتی كەركووك بۆ بۆریی نەوتی هەرێمی كوردستاندا بۆ بەندەی جەیهانی توركیا. ئەمریكاش پاڵپشتی لەو بابەتە دەكات، بەڵام هەرێم مەرجی هەیە.
دوێنێ وەزارەتی نەوتی عێراق ڕایگەیاند، حكومەتی هەرێم ڕەتی دەكاتەوە ڕۆژانە 300 هەزار بەرمیل نەوتی دیكە جگە لەوەی خۆی هەناردەی دەكات، ڕەوانەی بەندەری جەیهانی توركیا بكەن وەك قەرەبووكردنەوەی ئەو زیانەی بەر داهاتی عێراق دەكەوێت.
پاش چەند كاتژمێرێك وەزارەتی سامانە سروشتییەكانی هەرێم وەڵامی وەزارەتی نەوتی عێراقی دایەوە. وەزارەتەكە تۆمەتەكەی وەزارەتی نەوتی بە تەواوی ڕەت نەكردەوە، بەڵام ئامادەیی بۆ دانوستان و ڕێككەوتن نیشان داوە. دەشڵێت "وەزارەتی نەوتی عێراق هەموو ڕەهەندەكانی كێشەكەی باس كردووە و بابەتەكەی شێواندووە. هەوڵی تۆمەتباركردنی هەرێمی كوردستانی بۆ چەواشەكردنی ڕایگشتی داوە".
هەر ئەمڕۆ چوارچێوەی هەماهەنگیی شیعەكان وەڵامێكی توندی هەرێمی دایەوە و وتی "ڕاگەیەندراوی وەزارەتی سامانە سروشتییەكانی هەرێمی كوردستانی ڕەت دەكەینەوە و ئەو تۆمەتانەی ئاراستەی بەغدا كراون، هەنگاوێكی بێسوودن و هیچ خزمەتێك بە دۆزینەوەی چارەسەری ڕاستەقینە بۆ قەیرانەكە ناكەن".
چوارچێوەی هەماهەنگی جەختی لە چارەسەری ئەم قەیرانە بە هەماهەنگی و هاوكاریی جددیی نێوان حكومەتی فیدراڵ و حكومەتی هەرێم كردووەتەوە و دەشڵێت "داوا دەكەین بۆ دەستپێكردنەوەی پڕۆسەی هەناردەكردنی نەوت لە ڕێگەی بەندەری جەیهانەوە، بەرژەوەندیی باڵای وڵات بخرێتە پێشەوە".
هەر شیعەكان نین، تەنانەت سوننەكانیش لەوانە محەمەد حەلبووسی كە خاوەنی گەورەترین فراكسیۆنی پەرلەمانیی سوننەیە، دژی هەڵوێستەكەی هەرێم وەستاوەتەوە
هەر شەوی ڕابردوو پاش هەردوو ڕاگەیەندراوەكەی وەزارەتی نەوتی عێراق و وەزارەتی سامانە سروشتییەكانی هەرێمی كوردستان، مەسعود بارزانی، سەرۆكی پارتی دیموكرات، داوای لە حكومەتی هەرێم و حكومەتی عێراق كرد كۆببنەوە و كێشەكان چارەسەر بكەن، ڕێگەش نەدەن "خەڵكی هەلپەرست" قەیرانەكان قووڵتر بكەنەوە.