پەرەگراف - دەزگای ئاسایشی هەرێم هەڵوەشاندنەوەی "گرووپێکی مەترسیداری داعش" لەژێر ناوى "کەتیبەی پێنجی سەلمانی فارسی" سەر بە ویلایەتی کوردستانى ڕێکخراوەکە ڕادەگەیەنێت.
بەپێى ڕاگەیەندراوى دەزگای ئاسایشی هەرێم، لە زنجیرەیەک ئۆپەراسیۆندا کە دوو مانگى خایاندووە (08-12-2025 تا 09-02-2026)، ئەندامانى گرووپەکە کە 10 کەس بوون، لە "هەڵەبجە، سەیدسادق، پێنجوێن، گەرمیان و دیالە" دەستگیر کروان.
پرۆسەکە بە لەلایەن بەڕێوەبەرایەتی گشتیی ئۆپراسیۆنەکانی ئاسایش بە هەماهەنگی لەگەڵ دەزگای ئاسایشی نیشتمانیی عێراق ئەنجام دراوە. تێیدا دەست بەسەر "هەشت چەک، و یەک دەمانچە، دوو بۆمبی دەستی، ماددەی تەقینەوە لە جۆری سیفۆر، دووربین و پشتێنی خۆکوژی"دا گیراوە.
دەزگاى ئاسایشى هەرێم سەبارەت بە پلان و کارى ئەو گرووپە دەڵێت "پلانیان خۆ ڕێکخستنەوە و دروستکردنی گرووپی تیرۆریستی، دروستکردنی شوێنی مانەوە، گواستنەوەی چەکدارانی داعش لە وڵاتانی دراوسێوە بۆ کوردستان و خوارووی عێراق بووە"
ئێستا سەرجەم دەستگیرکراوەکان بە ماددەی (٤)ـى تیرۆر ڕاگیراون و لێکۆڵینەوە لە دۆسییەکانیان بەردەوامە.