پەرەگراف - چەند سەرچاوەیەكی ئاگادار بە ئاژانسی هەواڵی ڕۆیتەرزیان ڕایانگەیاند، مارك ساڤایا كە لە مانگی تشرینی یەكەمی ساڵی ڕابردوودا لەلایەن دۆناڵد ترەمپەوە وەك نێردەی تایبەت بۆ كاروباری عێراق دەستنیشان كرابوو، چیتر لەو پۆستەدا نەماوە.
دوورخستنەوەی ساڤایا لە كاتێكدایە كە پەیوەندییەكانی نێوان واشنتن و بەغداد لەسەر كاندیدكردنی نووری مالیكی بۆ پۆستی سەرۆكوەزیرانی عێراق بەرەو گرژی دەچێت، بەتایبەت كە شەوی ڕابردوو زۆرینەی لایەنە شیعەكانی ناو چوارچێوەی هەماهەنگی بەبێ گوێدان بە هۆشدارییەكانی دۆناڵد ترەمپ، سووربوونی خۆی لەسەر كاندیدكردنی نووری دووپان كردەوە.
بەپێی لێدوانی بەرپرسێكی باڵای عێراق بۆ ڕۆیتەرز، پێدەچێت تۆم باراك، باڵیۆزی ئەمریكا لە توركیا و نێردەی تایبەت بۆ كاروباری سووریا، دۆسیەی عێراقیش لە وەزارەتی دەرەوە بگرێتە ئەستۆ، كە لەم ماوەیەدا دوو جاریش سەردانی هەولێر كردووە.
ساڤایا كە بازرگانێكی مەسیحیی عێراقی-ئەمریكییە، یەكێك بوو لەو كەمینە عەرەبانەی كە ترەمپ لە پۆستە باڵاكانی ئیدارەكەیدا دایمەزراندبوو.
هێشتا بە تەواوی ڕوون نییە هۆكاری دووركەوتنەوەی ساڤایا چی بووە، بەڵام یەكێك لە سەرچاوەكانی ڕۆیتەرز ئاماژەی بەوە كردووە كە ساڤایا لە هەندێك دۆسیەی هەستیاردا "سەركەوتوو نەبووە"، لەوانەش شكستهێنان لە ڕێگریكردن لە كاندیدكردنی نووری مالیكی بۆ پۆستی سەرۆكوەزیرانی عێراق.
نوێ دەكرێتەوە...