پەرەگراف - هێزەكانی سووریای دیموكرات (هەسەدە) دەقی ڕێككەوتنەكەی لەگەڵ حكومەتی دیمەشق بڵاو كردەوە. بەپێی ڕێككەوتنەكە، چوار لیوا بۆ هەسەدە دروست دەكرێت و مافە مەدەنی و پەروەردەییەكانی كورد پارێزراو دەن. هەروەها دامەزراوەكانی خۆسەر دەخرێنە سەر دەوڵەت و هێزەكانی ناوخۆ دەچنە ناو شارەكانی حەسەكە و قامیشلۆ.
ناوەرۆكی دەقی ڕێككەوتنامەی نێوان هێزەكانی سووریای دیموكرات و حكومەتی سووریا
لە چوارچێوەی ڕێككەوتنێكی گشتگیردا، بڕیار لەسەر ڕاگرتنی شەڕ و تەقەكردن لە نێوان حكومەتی سووریا و هێزەكانی سووریای دیموكرات درا، لەگەڵ لێكتێگەیشتن لەسەر پڕۆسەیەكی قۆناغ بە قۆناغ بۆ یەكخستن و تێكەڵكردنەوەی هێزە سەربازی و كارگێڕییەكانی هەردوولا.
ڕێككەوتنەكە ئەم خاڵانە لەخۆ دەگرێت: كشانەوەی هێزە سەربازییەكان لە خاڵەكانی بەریەككەوتن، چوونە ناوەوەی هێزەكانی ئاسایشی ناوخۆی سەر بە وەزارەتی ناوخۆ بۆ ناوەندی شارەكانی حەسەكە و قامیشلۆ، دەستپێكردنی پڕۆسەی یەكخستنی هێزە ئەمنییەكان لە ناوچەكەدا، پێكهێنانی فیرقەیەكی سەربازی كە سێ لیوای هێزەكانی سووریای دیموكرات لەخۆ بگرێت، پێكهێنانی لیوایەكی تایبەت بە هێزەكانی كۆبانی لە چوارچێوەی فیرقەیەكی سەر بە پارێزگای حەلەب.
هەروەها بڕیار دراوە دامەزراوەكانی بەڕێوەبەریی خۆسەر لەناو دامەزراوەكانی دەوڵەتی سووریادا تێكەڵ بكرێن و فەرمانبەرە مەدەنییەكانیش لە كارەكانیان جێگیر بكرێن. لە بەشێكی تری ڕێككەوتنەكەدا، جەخت لەسەر یەكلاكردنەوەی مافە مەدەنی و پەروەردەییەكانی گەلی كورد و گەرەنتیكردنی گەڕانەوەی ئاوارەكان بۆ زێدی خۆیان كراوەتەوە.
ئامانجی ئەم ڕێككەوتنە یەكخستنەوەی خاكی سووریا و بەدیهێنانی پڕۆسەی تێكەڵكردنەوەی تەواوەتییە لە ناوچەكەدا، ئەوەش لە ڕێگەی بەهێزكردنی هەماهەنگیی نێوان لایەنە پەیوەندیدارەكان و یەكخستنی هەوڵەكان بۆ ئاوەدانكردنەوەی وڵات.