پەرەگراف - ئەنجوومەنی وەزاریی ئابووریی عێراق بڕیاری دا پێداچوونەوە بە داهاتی نانەوتیی هەرێمی كوردستاندا بكرێت. ئەم بڕیارە 17 مانگ لەمەوبەر و لە چوارچێوەی لێتێگەیشتنی نێوان هەرێم و بەغداد دراوە و دەبوو لە دوو هەفتەدا جێبەجێ بكرێت، بەڵام تا ئێستا بە جێبەجێنەكراوی ماوەتەوە.
ئەنجوومەنەكە پاشنیوەڕۆی ئەمڕۆ دووشەممە 14-12-2025، كۆبوونەوەیەكی نائاسایی بە سەرۆكایەتیی محەمەد شیاع سوودانی ئەنجام دا، تێیدا بە ئامانجی "زیادكردنی داهاتەكان"، ژمارەیەك بڕیاری دەركرد.
بەپێی ڕاگەیەندراوی نووسینگەی سەرۆكوەزیرانی عێراق، یەكێك لە بڕیارەكانی كۆبوونەوەكە، ڕاسپاردنی لیژنە هاوبەشەكەی نێوان هەرێم و بەغدادە بۆ پێداچوونەوە بە شێوازی هەژماركردنی داهاتی نانەوتیی هەرێمی كوردستان.
ئەم هەنگاوەی ئەنجوومەنی وەزاریی عێراق لەپێناو دیاریكردنی داهاتی ڕاستەقینە و بەركەوتەی ڕاستەقینەی بەغداد، بەئامانجی زیادكردنی داهات، بەتایبەت كە حكومەتی عێراق پێی وایە پشكی حكومەتی ناوەند لە داهاتی نانەوتیی هەرێم لەو 120 ملیار دینارە زیاترە كە ئێستا مانگانە ڕادەستی دەكات.
لە بڕیارەكەی ئەمڕۆی ئەنجوومەنی وەزاریی ئابووریدا هاتووە، دەبێت پێداچوونەوە بەو داهاتانەدا بكرێت كە ئێستا بە "بڕێكی دیاریكراو" دەخرێنە سەر هەژماری وەزارەتی دارایی فیدراڵ، پڕۆسەكەش بە هەماهەنگی لەگەڵ حكومەتی هەرێمی كوردستان ئەنجام دەدرێت.
ڕۆژی 17-07-2024، ئەنجوومەنی وەزیرانی عێراق دەقی لێكتێگەیشتنی نێوان هەرێم و بەغدای پەسەند كرد و وەكو بڕیاری ژمارە 550ـی ئەنجومەنی وەزیرانی عێراق بڵاوی كردەوە.
بەپێی دەقی لێكتێگەیشتنەكە و بڕیارەكەی ئەنجوومەنی وەزیران، حكومەتی هەرێمی كوردستان بەپێی خەمڵاندنی سەرەتایی، دەبوو ١٢٠ ملیار دینار وەك بەشی خەزێنەی فیدراڵ لە داهاتی نانەوتی تەنیا بۆ مانگی ئایاری ٢٠٢٥ ڕادەستی وەزارەتی دارایی فیدراڵ بكات.
هەروەها بڕیار درابوو بە یەكلاكردنەوەی دۆسیەی داهاتی نانەوتیی هەرێم لە ڕێگەی ئامادەكردنی ڕاپۆرتێك لەلایەن لیژنەیەكی هاوبەشەوە لە ماوەی دوو هەفتەدا و پێشكەشكردنی بە سەرۆكوەزیرانی عێراق، هەرچەندە ڕاپۆرتەكە پێشكەش كرا، بەڵام ڕاجیایی هەرێم و بەغداد لەبارەی داهاتە فیدراڵییەكانەوە، كێشەكەی تا ئێستا بە چارەسەرنەكراوی هێشتووەتەوە.