ژمارەی دانیشتووانی هەرێم ٦ ملیۆن و ٥٠٠ هەزار کەسی تێپەڕاند؛ هەولێر پێش کۆی دانیشتووانی سلێمانی و هەڵەبجە کەوت

پەرەگراف –  وەزارەتی پلاندانانی عێراق ئاماری وردی سەرژمێرییەکەی ساڵی ڕابردووی بڵاوکردەوە کە لە ٢٠-١٠-٢٠٢٤ ئەنجامدرا، ئامارەکان گۆڕانکاریی دیمۆگرافی لە سەرانسەری عێراق و هەرێمی کوردستان دەردەخەن. کۆی گشتیی دانیشتووانی عێراق گەیشتووەتە ٤٦,١١٨,٧٩٣ کەس، کە ٦,٥١٩,١٢٩ کەسیان دانیشتووی چوار پارێزگاکەی هەرێمی کوردستانن (هەولێر، سلێمانی، دهۆک و هەڵەبجە). ئێستا هەرێمی کوردستان ١٤.١٣٪ی کۆی دانیشتووانی عێراق پێکدەهێنێت.

هەولێر دەبێتە پڕدانیشتووانترین پارێزگای هەرێمی کوردستان

بەپێی سەرژمێرییەکە، ژمارەی دانیشتووانی پارێزگای هەولێر ٢,٥١٧,٥٣٤ کەسە، بەمەش بۆ یەکەمجار پێش کۆی دانیشتووانی هەردوو پارێزگای سلێمانی و هەڵەبجە کەوتووە، ئەو دوو پارێزگایە پێکەوە ٢,٤٠١,٧٢٤ دانیشتوویان هەیە. ئەمە گۆڕانکارییەکی دیمۆگرافییە، چونکە پێشتر سلێمانی و هەڵەبجە لە پێش هەولێرەوە بوون. ئێستا هەولێر ١١٥,٨١٠ کەسی زیاترە لە کۆی دانیشتووانی ئەو دوو پارێزگایە.
پارێزگای دهۆکیش بە ١,٥٩٩,٨٧١ دانیشتوو لە دوای ئەوان دێت.

ڕێژەی شارنشینی لە هەرێمی کوردستان ٨٥٪ـە

داتاکانی سەرژمێری ئاستێکی بەرزی شارنشینی لە هەرێمی کوردستان دەردەخەن، کە تێیدا ٨٥٪ی دانیشتووان لە شارەکان و تەنیا ١٥٪ لە گوندەکان دەژین.
بە گشتی ٥,٥١٣,٢٧٦ کەس لە ناوچە شارنشینەکان و ١,٠٠٥,٨٥٣ کەسیش لە گوندەکان دەژین.

وردەکاری بەپێی پارێزگاکان:

• دهۆک:١,٢٧٣,٥٤٦ شارنشین (٨٠٪)، ٣٢٦,٣٢٥ گوندنشین (٢٠٪).
• سلێمانی و هەڵەبجە:٢,١٣٧,٠٩٥ شارنشین (٨٩٪)، ٢٦٤,٦٢٩ گوندنشین (١١٪).
• هەولێر:٢,١٠٢,٦٣٥ شارنشین (٨٤٪)، ٤١٤,٨٩٩ گوندنشین (١٦٪).

دابەشبوونی دانیشتووانی شار و گوند لە عێراق

لە پارێزگاکانی دیکەی عێراقدا، ڕێژەی دانیشتووانی گوند زۆر بەرزترە. لە کۆی ٣٩,٥٩٩,٦٦٤ کەس، ٢٦,٨٥٠,٣٧٣ کەس شارنشینن (٦٨٪) و ١٢,٧٤٩,٢٩١ کەس لە گوندەکان دەژین (٣٢٪).

دابەشبوونی ڕەگەزی

لەسەر ئاستی وڵات، ڕەگەزی نێر ٥٠.٢٢٪ و مێ ٤٩.٧٨٪ی دانیشتووان پێکدەهێنن. بەڵام لە چەند پارێزگایەک ژمارەی مێ لە نێر زیاترە، لەوانە کەرکووک، نەینەوا، دیالە، ئەنبار و سەلاحەدین.
بۆ نموونە:

• کەرکووک:١,٠٢٢,٨٦٦ مێ بەرامبەر ١,٠١١,٧٦١ نێر.
• نەینەوا:٢,١٣٤,٧٥٨ مێ بەرامبەر ٢,١٢٧,٢٢٢ نێر.

دانیشتووانی بەغدا لە ١٠ ملیۆن کەس نزیک دەبێتەوە

ئێستا دانیشتووانی سەرجەم پارێزگاکانی عێراق و هەرێمی کوردستان لە سەرووی ملیۆنێک کەسەوەن. بەغدا بە گەورەترین دەمێنێتەوە بە ٩,٧٨٠,٤٢٩ دانیشتوو. موسەنناش بچووکترینە کە ١,٠٤٣,٠٨٧ دانیشتووی هەیە.
لە دوای بەغدا، نەینەوا بە پلەی دووەم دێت بە ٤,٢٦١,٩٨٠ کەس، دواتر بەسرە دێت بە ٣,٦٦٤,١٦٨ کەس.
هەولێر چوارەم گەورەترین پارێزگای عێراقە، سلێمانی لە پلەی حەوتەم، کەرکووک لە پلەی هەشتەم و دهۆک لە پلەی پازدەیەمدایە.

ژمارەی دانیشتووان بەپێی پارێزگاکان:

• بەغدا:٩,٧٨٠,٤٢٩
• نەینەوا:٤,٢٦١,٩٨٠
• بەسرە:٣,٦٦٤,١٦٨
• هەولێر:٢,٥١٧,٥٣٤
• زیقار:٢,٤٩٩,٤٦٨
• بابل:٢,٤٨٢,٣٢٤
• سلێمانی و هەڵەبجە:٢,٤٠١,٧٢٤
• کەرکووک:٢,٠٣٤,٦٢٧
• ئەنبار:٢,٠٠٤,٤١٨
• نەجەف:١,٩٥٠,٨٣٣
• دیالە:١,٩٣٤,٥٠٤
• سەلاحەدین:١,٧٧٤,٥٤٢
• کەربەلا:١,٧٥٤,٠٦٥
• واست:١,٦٤٣,٤٠٦
• دهۆک:١,٥٩٩,٨٧١
• دیوانیە:١,٤٧٧,٣١٠
• میسان:١,٢٩٤,٥٠٣
• موسەننا:١,٠٤٣,٠٨٧