بارزانی هۆشداریی لە بڵاوبوونەوەی ماددەی هۆشبەر دەدات و دەڵێت: پیلانی بەرنامە بۆ داڕێژراوی دوژمنەو گەورەترین مەترسییە
پەرەگراف- مەسعود بارزانی لە بانگەشەی پارتی لە دهۆک تیشکی خستەسەر مەترسییەکانی ماددەی هۆشبەرو هۆشدارییدا لەوەی بە بەرنامە بۆ داڕێژراوی دەیانەوێت کوردستانی پێ هەڵتەکێنن، ئەوە لەکاتێکدایە بەپێی بەدواداچونێکی پێشتری پەرەگراف، تەنیا لە ساڵی ٢٠٢٣دا هەزار دۆسیەی ماددەی هۆشبەر لە پارێزگای دهۆك هەبووە، لە كاتێكدا دەیەیەك لەمەوبەر ئەو ژمارەیە لە 50 دۆسیە تێنەدەپەڕی، بەوپێیەش لەو ماوەیەدا ١٩ هێندە زیادی کردووە کە بە ڕێژەی سەدی دەکاتە ١٩٠٠%، تەنیا لە دهۆکیش نییەو ئامارەکانی ماددەی هۆشبەر لە سەرتاسەری کوردستان زەنگی مەترسیی لێدەدەن.
سەرۆکی پارتی لە کۆبوونەوەیەکی جەماوەرییدا لە دهۆک، جەختی لە پێویستی بەرنگاربوونەوەی ماددەی هۆشبەر و مەترسییەکانی کردەوە و وتی "پیلانی ئێستا و دوژمنایەتی ئێستا لەگەڵ میللەتی ئێمە زۆر مەترسیدارتر و گەورەترە لە هی ڕابردوو، ئێستا بە شێوەیەكی بەرنامە بۆدارێژراو دەیانەوێت خەڵكی ئێمە و گەنجی ئێمە توشی ماددەی هۆشبەر بێت، ئەمە گەورەترین مەترسییە، دەیانەوێت خەڵكی ئێمە توشی بێ ئومێدی بکەن و هیچ سۆز و ئینتما بۆ نیشتمان نەمێنێت".
"ئەرکی گەورە لەسەر شانی ئێوەیە هەر ئافرەتێك منداڵەکەی لە ماڵەکەی خۆیدا تێبگەیەنێت کە چ پیلانێكی مترسیدار لەسەر ئێمە هەیە، ئەگەر گەنجی ئێمە باوەڕی بە خۆی نەما ئێمە هیچ دۆزێكمان نامێنێت" بارزانی وای وت.
لە بەشێکی دیکەی وتەکانیدا بارزانی باسی لە قەیرانی چەند ساڵەی مووچە کرد، وتی "مووچەی خەڵکی کوردستانیان کرد بە قەزیەیەکی سیاسی و وەك کارتێك بەکاریان هێنا بۆ ئەوەی هەرێمی کوردستان لەناوببەن، ئەمەش بە چاوساغی خەڵكێكی ناوخۆیی بوو کە ڕێگایان بۆ بەغدا خۆش کرد و ئەمەش لە ئەنفال و کیمیاباران کەمتر نیە".
مەسعود بارزانی بە نیگەرانییەوە باسی ئەوەی کرد هێشتا "عەقڵیەتی زوڵمکردن" لە خەڵكی کوردستان لەلایەن بەغداوە ماوە و لەسەر سیاسەتی خۆیان بەردەوامن، وتیشی "دڵنیاتان دەکەینەوە کەس ناتوانێت نە بە موچە و نەبە هیچ شتێكی تر ئیرادەی ئێمە بشکێنێت و خۆی لەسەر ئێمە فەرز بکات".
سەرۆکی پارتی جەختیشی لە گرنگی یەکڕیزیی کورد کردەوەو وتی "ئەگەر ئێمە یەكگرتوو و یەكڕیز و تەبا بین هیچ هێزێك دەرەقەتی ئێمە نایەت، ئەو کێشانەی کە ئێستا ڕووبەڕووی ئێمە دەبنەوە هەمووی دەرئەنجامی نەبوونی یەكڕیزییە".