پەرەگراف
سەركردەیەكی بزووتنەوەی گۆڕان بیرۆكەیەك بۆ "هەڵوەشاندنەوەی گۆڕان و دابەشكردنی سەروەت و سامانەكەی" لەنێوان دوو ئاراستەكەی بزووتنەوەكەدا، ئاشكرا دەكات. بیرۆكەكە "بە ڕاوێژ" لەگەڵ گۆڕانی كوردستان كراوە. كوڕەكانی نەوشیروان مستەفا "پێیان باش بوو"ـە، بەڵام چیا ڕایگەیاندووە كە "دانوستان" لەسەر كەلوپەل و شتەكانی ناو گردەكە ناكات.
شەماڵ عەبدولوەفا، سەركردەی دیاری بزووتنەوەی گۆڕان، لە ڕوونكردنەوەیەكدا دەڵێت "پێش كەمتر لە دوو مانگ، دوای ڕاوێژ لەگەل باڵی كوردسات، من كاك و مستەفای سەید قادر دانیشتنێكمان لەگەڵ كاك چیا ڕێك خست و چووینە لای، تا بیرێك لە دوادەرچە بۆ ئەم بارە نالەبارەی بزووتنەوەی گۆڕان بكەینەوە".
نما نەوشیروان مستەفایش بە تەلەفۆن لە كۆبوونەوەكەدا بەشدار بووە و هەریەك لە مستەفا سەید قادر و شەماڵ عەبدولوەفا، بیرۆكەیەكیان بۆ چارەسەری كێشەكانی نێوان دوو ئاراستەكەی گۆڕان خستووەتە ڕوو.
"وەك ناتوانین ڕێك بكەوین، ناتوانین پێكەوە كار بكەین، ناتوانین لەژێر یەك چەتر و لە یەك ماڵدا هەڵ بكەین، با بە هێمنی و لەسەر خۆ و بە ئەدەب و ئاكارێكی بەرزەوە، لە یەك جیا ببینەوە و دوور بكەوینەوە لە پەلاماری یەكتری و یەكتر شكاندن"، شەماڵ عەبدولوەفا وای بە چیا نەوشیروان مستەفا وتووە.
بەپێی ڕوونكردنەوەی شەماڵ عەبدولوەفا، پاشان ئەو دوو سەركردەی گۆڕان بیرۆكەكەیان خستووەتە ڕوو و وتوویانە "با بزووتنەوەكە هەڵبوەشێنینەوە. چی سەروەت و سامانی هەیە دابەشی بكەین. دواتر كێ و چ لایەك سەرپشك دەبێت چی دەكات؟ سەروەت و سامانەكەی دەبەخشێ یان نا؟".
شەماڵ عەبدولوەفا دەڵێت "كوڕەكانی ڕەوانشاد بیرۆكەكەیان پێ باش بوو. وەكوو پرەنسیپێكی سەرەتایی، وتیان پرس بە برادەرەكانمان دەكەین لەسەر شێواز و فۆرمی كارەكە، دواتر وەڵامتان دەدەینەوە".
"چیا تەحەفوزێكی لەسەر مومتەلەكاتی ناو گردەكە ھەبوو و وتی: ئەو بابەتە لای من بڕاوەیە كە دانوستانی لەسەر بكەین، بەڵكو لەسەر سەروەت و سامانی دەرەوەی گردەكە ڕێك بكەوین"، شەماڵ عەبدولوەفا وا دەڵێت.
ئەو سەركردەی گۆڕان ڕایدەگەیەنێت كە تا ئێستا چاوەڕێی وەڵامن بۆ ئەو بیرۆكەیە.